Ni 14 April, 2024 Chawlhni Zan Inkhawm chu tun tum Kristian Chhungkaw Campaign kan neih a tawp zan a ni ta der a. Kohhran member inkhawm pawh kan tha hle a; Biak In chhung bakah Gallery, Extension thlang & chhak bakah kawtah te pawh mi eng emaw zat an thu a ni. Upa R. Lalropuian inkhawm hruaiin Kohhran Zaipawl ten Pathian fak hla mawi tak an rem a. Kan thawhlawm te Upa Silianan a hlan a ni.

Kan speaker Upa C. Ngurthantluangan nu leh pate chauh ni lovin, thalaite leh naupang zawkte mamawh thil tam tak a tarlang a. Kohhran mipuite tana tangkai tur Kristian Chhungkaw kaihhnawih survey result pawimawh tak tak te pawh a sawichhuak a, a bengvarthlakin a hlawkthlak hle a ni.

Inkhawm banah Kristian Chhungkaw Committee ten thla lakpuiin kan rawngbawltu leh amah tawiawmtute thingpui an inpui bawk a ni.

Ni 14 April, 2024 chawlhni chawhnu inkhawmah Upa R. Lalropuia, Secretary chu hruaitu niin kan Speaker hnen atangin ‘Kristian Chhungkaw Hmelma’ tih kan ngaithla a. Pathianni Naupang Inkhawm te leh Christian Teenagers Group te pawh biak inpuiah inkhawmin speaker pawhin lawmawm a tih thu a sawi a ni.

Ni 13 April, 2024 (Inrinni) zan inkhawm atangin Kohhran hoten kan lo nghak hlelh em em Kristian Chhungkaw Campaign chu Speaker Upa C. Ngurthantluanga hovin kan tan thei a. Upa R. Lalropuia, Secretary-in inkhawm a hruai a. Upa R. Lalnghaka, Asst. Secretary-in thu a puan hnuah Kohhran hoten inrinni zana kan tih thin dan angin kan tawngtai rual a. He tawngtairualnaah hian ni 19 April, 2024 a Lok Sabha Member kan thlan tur chungchang te a bik takin thupui atan kan nei nghe nghe a ni.

Upa C. Ngurthantluangan Kristian Chhungkaw chungchang ngaihnawm takin a sawi a. Tunlai khawvela Kristian Chhungkaw hlutna leh pawimawhna te tarlangin kohhran hoten a thusawi hlawkthlak kan ti hle a ni. Kohhran Pavalai Pawl Inkhawmpui Vawi 6-na East Lungdar a neih mekah Pavalai member eng emaw zat an kal a, chuti chung chuan inkhawm kan tha thawkhat hle a ni.