Ni 4 April, 2024 zan inkhawmah kohhranhoten Kohhran Ni Pawimawha kan chhiar ‘Harhna Thlen Ni Vawi 118-na’ lawmin kan inkhawm a. Tun tum Harhna Thlen Ni hi kohhranhoten Kohhran Ni Pawimawh anga kan chhiar tan hnua vawi 40-na chiah a ni bawk a ni. Upa H. Lalthankhuman inkhawm hruaiin Pi Vanhnuaithangi chu tantu a ni a. KHB 346 ‘Aw Pathian, Nangman Chanchin Tha Min Pe’ tih kan sak hnuin Upa R. Lalropuian thupui awm sa ‘Harhna Chuan Ringtu A Tichak’ tih a sawi a ni. Inkhawm banah kohhranhoten thingpui kan inho nghal a ni.

Ni 25 March, 2024 khan Sacrament Department te chuan kum danga kan lo tih thin angin Synod Hmun Pawimawh te an tlawh a. Zirlai zingah pakhat kal lovin mi 23 an kal thei a, zirtirtute zingah mi 7 an kal thei bawk a ni. Hawla Indoor Stadium atangin zing dar 10-ah an chhuak a. Synod Office Mission Vengah tlawh tur awm hrang hrangte an tlawh kual a, chumi hnuah Synod Missionary Training Centre an tlawh leh a. Aizawl Theological College-a Biblical Garden-ah chawchhun eiin ATC hmun te an fan zawhah Youth Recreation Centre tlawhin tluang takin tlai dar 3:15-ah kan veng an lo thleng leh a ni.

Ni 31 March 2024 Easter Sunday Zan Inkhawmah Upa Lalhmunsanga chairman niin Christian Teenagers Group leh Kohhran Zaipawl atangin Pathian hl fakna hla mawi taka an rem kan ngaithla a. Upa C. Lalrinzualan thupui awm sa ‘Kumkhuain kan hnena awm zel a tiam’ tih kan ngaithla a. Inkhawm banah lengkhawm awmin Pu R. Lalthangzaman a kaihruai a ni.

Ni 31 March 2024 Easter Sunday Chawhnu Inkhawmah chuan vanneihthlak takin ruah a han ta a, kohhranhote tan pawh chet vel a nuam ta deuh sawt. Upa R. Lalnghakan inkhawm a hruai a, Pi Ramnghaki tantu niin Pathianni Naupang Inkhawm ten fak hla ropui takin an rem a. Nl. C. Vanlalzawni hnen atangin thupui awm sa ‘Mi dek ula, en rawh u,’ tih kan ngaithla a ni.